XIV día das Rapazas nas TIC – 2026

As protagonistas

Marta Castiñeira Reis . Técnica de investigación en simulación computacional para o proxecto EDD-DATAlife no CESGA. Doutora en Química Teórica e Modelización Molecular pola Universidade de Vigo (2019). Posteriormente, foi investigadora posdoutoral na Universidade de Groningen (2019-2022) e na Universidade de Santiago de Compostela (2022-2024). En 2024, foi nomeada Profesora Axudante Doutora na Universidade de Alcalá de Henares e actualmente é Técnica de Investigación Computacional e Análise de Datos no CESGA.

Patricia González Gómez. Catedrática e investigadora no Departamento de Enxeñaría de Computadores da Universidade da Coruña. A súa investigación céntrase na computación de alto rendemento, incluíndo o uso de supercomputadores, computación na nube (cloud) e análise de grandes volumes de datos (big data) para resolver problemas científicos complexos. Tamén traballa en áreas como a bioinformática e o desenvolvemento de métodos avanzados para acelerar cálculos e analizar grandes cantidades de información. Coordinou o Máster en Computación de Alto Rendemento e ocupou varios postos directivos na Universidade da Coruña.

Hilda Romero Velo é investigadora no CITIC e candidata a doutora en Computación pola Universidade da Coruña (UDC). Con formación en Música e Informática, e experiencia como pianista e gaiteira, centra a súa investigación na Recuperación de Información Musical e na Etnomusicoloxía Computacional. Traballa especialmente coa música de tradición oral, como a galega e a irlandesa, empregando metodoloxías e algoritmos da informática e da bioinformática para analizar e comparar melodías co obxectivo de comprender as relacións entre diferentes tradicións musicais. Ademais, desenvolve ferramentas que apoian a aprendizaxe de partituras e sistemas capaces de buscalas a partir dunha cantaruxada ou da interpretación dunha melodía nun instrumento.

Aránzazu Sucasas Hermida traballa en Telefónica e actualmente é candidata a doutoramento na Universidade de Vigo (UVigo), onde desenvolve unha investigación centrada na segmentación de lesións mamarias en resonancia magnética para a detección precoz do cancro de mama. É licenciada en Enxeñaría de Telecomunicacións e conta cun Máster en Enxeñería Biomédica e Saúde Dixital . Na actualidade traballa en Optimización Radio en Telefónica Móviles, centrada na análise e mellora do rendemento das redes móbiles (5G, 4G e 3G) para garantir a calidade dos servizos de voz e datos.